Faltando tan só oito meses para as eleccións municipais, que serán en maio de 2007, na Estrada parece que en algúns partidos parece que se van aclarando as cousas, que xa empezan a despexarse as incógnitas de quen serán os candidatos a alcalde da Estrada. Segundo se reflicte na bitácora Disque na Estrada, o BNG xa despexou a súa incógnita, mais ainda non a fixo pública as espensas da ratificación da executiva do BNG en Santiago. Así, segundo puidemos saber, Raquel López Doce será a candidata do BNG, elixida por amplia maioría, coincidindo tamén co reflictido na bitácora que aludimos anteriormente, que non atopou grandes obstáculos para ser elixida, malia a que meses antes se barallaban, ademais dela, outros nomes como posibles candidatos, que mesmo se auto-postulaban nos medios, pero polo que se ve estas propostas non chegaron a callar.

Nas filas do PSOE as cousas ainda non están claras. Hai uns meses soaba o nome de Dono como posible candidato, que logo parecía descartarse, e agora volve a soar con forza. Pero tampouco se pode descartar a Espiño, que é o actual portavoz, e que ve nestas eleccións a súa última oportunidade, o agora ou nunca, e que seguro pelaxará por seguir e seguir sendo o candidato a alcalde. Mais como non hai dous sin tres, según poidemos saber Figueiras ten un “sobriño” que quere ser candidato, Sanmartín Obelleiro, aparecendo publicamente en roldas de prensa do partido, acompañando ós actuais concelleiros. Figueiras como bo padriño trata de axudarlle. De momento, esto é o trascende desde as filas do PSOE.

E no PP todo parece que vai a ser Maceira, que ultimamente está a ter unha grande relevancia pública, suplindo ó alcalde en gran cantidade de actos, que xa parece querer adiantar o seu retiro. Desde logo a atitude do Maceira nos actos públicos é xa de Alcalde. Con todo, segundo puidemos saber, non as ten todas consigo, e volve a soar con forza, como no caso de Dono, o nome de De la Calle, Xerente da Fundación do Moble, pero moi posiblemente se trate dun globo sonda, en ambos casos (Dono e De la Calle), para despistar e condicionar certas decisións. ¡¡Xa se verá!!

Con todo, non podemos olvidarnos dos cuartos en discordia, se finalmente se deciden a presentarse: os independentes. Destos pouco se sabe, pero unha das persoas máis activas e combativas de AEDRU podería ser o cabeza de cartel.

Como se dun revolucionario se tratara o Alcalde saiu á rúa para reclamar que non lle quitaran o centro de saúde á xente e púxose de primeiro e dirixiu a protesta como se lle fora a legislatura nelo. Parece que lle gustaba esta nova estratexia de botarse á rúa fronte ao bipartito que ultimamente está empregando o seu partido, logo de pasearse o domingo polas rúas de Santiago. O malo que se esqueceu de que el é o alcalde, e polo tanto tamén é responsable do que pasa no seu concello.

Tamén estaba representando o BNG a través dunha das súas concelleiras, Noa, pero aquelo non era unha manifa bloqueira, e atopábase un pouco desubicada entre tanta xente que non é asidua das manifestacións que organiza o BNG da Estrada.

O PSOE nin estaba nin se lle esperaba.

Había moita xente onte na clausura da Feira do Moble. E a sensación de agobio era manifesta, nun recinto con moitas carencias, pero sobre todo con pouco espazo para realizar un evento destas características.

O recinto xa hai varios anos que non sirve para unha feira que ten repartir os stands polos pavillóns de deporte. Desde logo a isto hai que buscarlle unha solución, porque é un espectáculo penoso tarde ou cedo pasará factura á Feira do Moble.

Se o ano pasado o BNG e o BNG se repartiron a inauguración e a clausura respectivamente, este ano os dous actos estiveron protagonizados única e exclusivamente pola parte do BNG no goberno da Xunta. ¿Por que o PSOE se mantivo desparecido deste acto tan importante para A Estrada? ¿Pode ser un desplante ó Miguel de la Calle, que Figueiras lles gustaría ver fóra da Fundación?

Na clausura había ausencias clamorosas. O alcalde non estaba, que deixou o testigo ao seu delfín, Maceira. Do resto dos concelleiros do PP, só se viu a López (é difícil non velo): Reboredo, Arca, Somoza, etc. Estaban desaparecidos. Ó mellor é que ainda estaba na sobremesa da comilona popular do Monte do Gozo, post manifestación de SOS contra o Lume. Así, o Maceira, tivo que comparecer en solitario diante do Conselleiro Alfredo Suárez Canal, e abofé, que parecía bastante descolocado e ninguneado diante da avalancha nacionalista.

Desta volta Figueiras, o presidente de ACE si subiu ó estrado, que parece que en domingo o móbil dálle un respiro, e tamén Espiño, que ocuparon cada un dos extremos do estrado, mantendo as distancias.

O que era un ruxe-ruxe na política municipal xa empeza a confirmarse pouco a pouco. Xa hai xente disposta a montar unha candidatura de independentes na Estrada para as eleccións municipais de 2007.

¿Quen anda detrás?, pois dende persoas vencelladas ó mundo empresarial, que atoparon o caldo de cultivo para tomar esta decisión nas trifulcas co tema do PXOM, que aínda non rematou; os de AEDRU, claramente interesados en defender os seus intereses particulares no eido urbanístico, que onde se move o cardinillo; pero tamén cabreados do eido político, dos que non atopan sitio nas listas para as vindeiras eleccións nas formacións políticas tradicionais e que buscan o seu asento neste tipo de organizacións políticas que aparecen e desaparecen como o Guadiana. Estaremos atentos a isto último, porque podería haber sorpresas.

Como dixemos, estas formacións aparecen e desaparecen, van e veñen, e sempre ocorre cando o PP está dividido, para logo, unha vez medidas as forzas nas eleccións voltar a unirse como acontedeu en 1991, cando os independentes, capitaneados por Ramón Campos, e o PP orquestaron unha moción de censura contra o PSOE e o BNG, dando como resultado 15 anos de goberno do PP, na que se tomaron as decisións urbanísticas máis controvertidas, algunhas das cales xa foron calificadas polos tribuanis como ilegais.

O nome xa o teñen, Alternativa Estradense, que, segundo os rexistros do Ministerio do Interior, figura inscrita dende o 10 de marzo de 1995, e cuxo enderezo é “Avda. Benito Vigo, 36, 1o. Dta.”. Agora só queda saber quen será a persoa que encabeza esa lista e a composición da mesma. ¿Quen será?, estaremos atentos…

Na banda socialista, Figueiras está nunha posición incómoda, pola súa contradición, o seu corazón “partío” no do PXOM, entre ser concelleiro do PSOE e Presidente da ACE. E ademais parece cabreado con Miguel de la Calle. Na inauguración da Feira do Moble, non subiu ó estrado (algo que levaba facendo desde hai moitos anos) e a comitiva socialista, encabezada por un Espiño en baixa forma, mesmo se distanciou da oficial. ¿Sería que non lle querían facer séquito a ampla representación institucional, tanto local como do goberno galego, da ala nacionalista do bipartito? Algún paxariño contounos que Figueiras non só libra a fronte de pór en envidencia a De la Calle, senón que a súa estratexia pasa por colocar a un novo cabeza de lista na candidatura socialista (ou ser el mesmo, claro) e que a súa teima ten moitos apoios na executiva local. ¿Malos momentos para o tenaz Espiño?

Despois de que os órganos comarcais decidisen que Constenla seguise como Delegado Provincial da Consellería de Medio Rural e que aquel apadriñase a Raquel López como candidata, as cousas parecen estar máis claras. Moitos pregúntanse se Constenla aceptou a decisión de bo grado ou aínda lle seguía roendo o verme de aparecer de novo como cabeza de cartel. Polas súas declaracións á prensa non parece que estea moi cabreado pola decisión do seu partido e o seu apoio a Raquel López tamén é un indicio de que non a consideraba unha competidora ó cargo, senón que mesmo unha aposta persoal. A dúbida, agora, está por ver se haberá novas postulacións ou se, como se escoita nalgúns círculos, teñen preparado algo na recámara. Pero cunha posición de partida xa tan definida, ¿arriscarán a cambiar de estratexia no medio da xogada?

Os últimos días destacados membros da política local estradense saíron á palesta pública visualizando o estado actual da cousa pública municipal. Ó alcalde, Ramón Campos, véselle feliz, como querendo despedirse do cargo e loubando e facéndolle a pelota ao conselleiro nacionalista de Innovación e Industria, Fernando Blanco, na inauguración da feira do moble. Mesmo parecía que, de repente, Campos se convertera ó nacionalismo de forma súbita. O Conselleiro aceptou o guante e agradeceu as palabras do alcalde. Será que don Ramón xa se sitúa por riba do ben e do mal e xa desiste de tutelar a súa sucesión? Por certo, as dúas sensibilidades do PP estradense están escenificando á perfección as súas diferenzas: na feira da becerra, apareceron os “maceiristas”; na do móbel, López, xunto con Campos, en solitario e nas presentacións da Estrada Dixital, os “reboredistas”, ou sexa, Reboredo e Arca. Quen levará definitivamente o gato á auga?.

En canto a Figueiras, é un home pegado a un móbil. Tanto lle ten que vaia a inauguración da Feira do Móble e que nese intre estea a falar o Alcalde, el ao seu: o móbil. Vese que debe ter moitas cousas que atender, ¿ou estará buscando reforzos para ser candidato?.

Moito gastou o Concello no novo portal web que sustiuiu ó oscuro que había hai uns meses; segundo nos fixeron saber, costou uns 250 mil euros. Pero a sustitución ó noso parecer non cumpre as expectativas creadas e iso que estamos nunha cidade dixital.

Na nosa opinión é incómodo navegar por el, costa atopar as cousas, mesmo a normativa, que sería unha das cousas que máis se debería destacar. Faltan contidos, moitos, sobre todo bótase de menos que non se poidan descargar as actas dos plenos, como ocurre na páxina do Concello de Vigo ou Vilagarcía.

Outra cousa que nos chamou á atención son as fotos: hai dúas galerías, unha A Estrada onte e A Estrada hoxe. A calidade destas últimas é cuestionable e non digamos a actualidade, nunha delas ata sae a fonte do Concello que xa non existe (afortunadamente, xa que ao noso entender eliminar a fonte foi unha das decisións máis acertadas do PP nos últimos tempos).

A ver se o xornalista que contrataron lle dá outros aires a este portal.

Remexendo pola rede atopamos esta noticia sobre a valoración dos portais municipais da nosa comarca. E aquí o informe orixinal con todos os concellos de Galicia.

O ciberespazo estradense acolle desde hoxe unha nova bitácora que se vén sumar a outras iniciativas (Disque na Estrada, …), co fin de rexoubear sobre aqueles asuntos da vida política, social e económica da Estrada que, por unhas razóns ou outras, quedan fóra dos xornais, as radios ou as tv locais. A nosa é unha aposta complementaria, en positivo e co ánimo de proporcionar novas claves e estimular o debate sobre os aconteceres cotiáns do que ocorre na Estrada e algúns prefiren calar. Benvidos a todos. Contamos coa vosa participación.